Skógræktarfélag Íslands
Þórunnartún 6 | 105 Rvk | Sími: 551 8150 | Netfang: skog@skog.is

  • Facebook App Icon
  • S.Í

Skógarreitur á
Kirkjubæjarklaustri


-Upplýsingar

Ábyrgðaraðili: Skógræktin

 

 


 

 

 

Almennt um skóginn


Á Kirkjubæjarklaustri er löng hefð fyrir skógrækt og eru skógarlundir sitt hvorum megin við Systrafoss. Í skóginum vaxa aðallega birki og sitkagreni og var stofnað til hans af fjölskyldunni á Klaustri og er skógurinn í eign Klausturbænda. Á seinni árum hefur ýmsum trjátegundum verið bætt við, stígar gerðir í gegnum skóginn og borðbekkir settir upp.

 

Staðsetning og aðgengi


Skógurinn á Kirkjubæjarklaustri er í brekkunni ofan við kauptúnið umhverfis Systrafoss.

 

Aðstaða og afþreying


Stígar hafa verið lagðir um reitinn ásamt áningarstöðum með bekkjum. Liggur stígurinn að Systravatni  upp með Systrafossi í gegnum skóginn. Einnig er torfarinn stígur að Sönghelli sem er undir klettum vestan við Systrafoss.

 

Saga skógarins


Upphaf skógarins má rekja til þess að heimafólk á Klaustri girti af brekkurnar ofan við bæinn og gróðursetti þar 60.000 birkiplöntur. Áttu hjónin Helgi Lárusson og Sigurlaug Helgadóttir stóran þátt í því að til skógarins var stofnað. Á næstu árum var bætt inn sitkagreni, lerki og furutrjám. Um 1964 var gerður samningur við Skógrækt ríkisins um viðhald girðinga og umsjón með skóginum. Hefur Skógræktin á síðustu árum bætt aðgengi að skóginum auk þess að bæta við sjaldgæfum trjátegunum.

 

Kirkjubæjarklaustur, kort

 

Trjárækt í skóginum


Mest er af birki og sitkagreni í skóginum. Á seinni árum hefur ýmsum tegundum verið bætt við, t.d. hlyni, álmi, reynitegundum, aski, þöll og lífviði.

 

Annað áhugavert í skóginum


Eitt hæsta, ef ekki hæsta, sitkagrenitré landsins er að finna í reitnum við Kirkjubæjarklaustur og mældist það 26,1 m á hæð 13. ágúst 2014. Ekki er vitað um hærri tré á Íslandi.

 

Fengið með leyfi frá: www.skogur.is